Síminn minn hringdi klukkan fimm mínútur yfir sjö áðan og ég sá strax að hringjandi var, eins og svo oft áður, Gallup. Ég svaraði nú samt og eins og svo oft áður var beðið um Telmu. Það er aldrei beðið um mig. Telma var að borða og mata Brynhildi Hafdísi og sagði ég því að hún væri upptekin. Afgangurinn af samræðunni var svo hljóðandi:

Stúlka frá Gallup: "Get ég hringt í hana seinna í kvöld?"
Ég: "Jaaa... þetta er reyndar ekki símanúmerið hennar."
SG: "Nú?"
Ég: "Þetta er ekki síminn hennar heldur minn."
SG: "Hvað er þá númerið hennar?"
Ég (eftir smá umhugsun): "Ég vildi heldur ekki gefa þér það."
SG: "Hvað meinarðu?"
Ég: "Mér finndist óviðeigandi að gefa þér númerið hennar."
SG (hissa og fúl): "Það er nú bara almenn kurteisi." (Smá hik) "Þetta er bara Gallup!"
Ég: "Þetta er ekkert persónulegt við þig."
SG (reið): "Nú hvað þá?!"
Ég (undrandi): "Heyrðu, ég nenni þessu ekki, ég er að borða."

Hafandi engu meira að bæta við í þetta samtal, skellti ég á.

Mér fannst ekkert óeðlilegt við að vilja ekki gefa upp símanúmerið hjá Telmu, hún er ekki einu sinni skráð í símaskránni. Fólk sem hringir, kynnir sig ekki, ætlast til þess að maður sýni þá almennu kurteisi sem maður myndi sýna annars kurteisu fólki sem ekki vinnur hjá fyrirtæki sem hefur lifibrauð af því að trufla fólk á matmálstíma og verður fúlt við minnsta tilefni, ætti í raun ekki að vinna hjá slíku fyrirtæki. Ég veit ekkert hvort það hafi almennt verið erfitt kvöld/dagur/ár/líf hjá þessari stelpu og mér er líka alveg sama, ég veit ekki hvað hún heitir eða hver hún er, eina sem ég veit er að hún hringdi í mig og var ekki skemmtileg. Mér fannst nógu leiðinlegt að tala í símann fyrir. 

Skrifaði Karl Jóhann kl. 19:22

  Það er mun skemmtilegra að fylgjast með kvennalandsliðinu í fótbolta heldur en karla. Ekki bara vegna þess að þær vinna leiki og heldur ekki bara vegna þess að það er auðveldara að horfa á þær, heldur vegna þess að kvennafótbolti er svo laus við þann hroka sem gegnumsýrir þessa uppblásnu atvinnumenn. Mórallinn er miklu betri hjá stelpunum og töffaraskapurinn, undarlega nokk, mun minni.

En hafandi sagt það þá er samt oftast skemmtilegra að horfa á karlalabolta, þeir eru eftir allt saman dáldið betri í þessu. 

Skrifaði Karl Jóhann kl. 12:16

  Gleðilegan 19. júní.

Við keyptum nýjan barnabílstól í gær, alveg svakalegt ferlíki, núna kemst Telma ekki lengur fyrir í bílnum þar sem ekkert pláss er frammí þar sem stóllinn þarf svo mikið pláss og ekkert pláss er fyrir aftan mig því ég er svo aftarlega. En það er allt í lagi, ég setti upp smá pláss fyrir hana í skottinu.

Það var yndislegur eldri maður að afgreiða þegar við keyptum stólinn og hann heimtaði að við fengjum 40% afslátt sem við töldum okkur ekki eiga rétt á áður en við fórum þangað. Það kemur sér skemmtilega vel.

Annars er víst komið að mánaðarlegri uppbót sem að þessu sinni verður sögð frá hlið Brynhildar Hafdísar. Hún verður fátækleg að þessu sinni þar sem við höfum ekki verið með myndavél góðan hluta mánaðarins, en úr því verður svo sannarlega bætt þar sem við eigum núna stórglæsilega nýja myndavél sem Farfuglinn var svo væn að sækja í Fríhöfnina. En myndavélin er eins og áður sagði STÓRGLÆSILEG og við mjög ánægð með hana.





 

Skrifaði Karl Jóhann kl. 20:59

  Nú hef ég oft ekki skilið þennan gaur en...

Nennir einhver að útskýra þetta fyrir mér? 

Skrifaði Karl Jóhann kl. 18:57

  Fagnaðaróp heyrðust víða um Ísland í dag, reykingar bannaðar á almenningsstöðum. Það hlaut að koma að þessu, allt hefur stefnt í þessa átt undanfarna áratugi.

Ég er afskaplega hrifinn af þessari löggjöf en hef þó smá áhyggjur þar sem boð og bönn eru allt of móðins þessa dagana, hvenær fara þeir að leyfa hluti sem ættu ekki að vera bannaðir? 

Skrifaði Karl Jóhann kl. 18:36